गल्छी गाउँपालिका अन्तर वडा पुरुष भलिबलको उपाधि वडा नं ४ लाई

गल्छी खबर। गल्छी गाउँपालिका शिक्षा शाखाको आयोजनामा आज सम्पन्न‌ अन्तर वडा स्तरीय पुरुष भलिबल प्रतियोगिताको उपाधि वडा नं ४ ले उचालेको छ।

सेमिफाइनल खेलमा वडा नं २ लाई हराएर फाईनल प्रवेश गरेको वडा नं ४ र वडा नं ६ लाई हराएर फाइनल पुगेको वडा नं १ बिचको रोचक फाईनल खेलमा वडा नं ४ ले वडा नं १ लाई सोझो सेटमा हराएको छ। वडा नं ४ लाई पहिलो सेट जित्न हम्मे हम्मे परे पनि बाँकी २ सेटमा सहज जित हातापारेको छ।

तेस्रो पटक आयोजना गरेको पुरुष भलिबल प्रतियोगितामा प्रथम हुनेले नगद रु ३०००० पुरस्कार प्राप्त गरेका छन् भने दोस्रो हुनेले नगद रु २५००० र तेस्रो हुनेले नगद रु २०००० प्राप्त गरेका छन्। 

खेलकुद विकासमा जोड दिदै आएका शिक्षा, युवा तथा खेलकुद शाखा प्रमुख धिरज बस्नेतका अनुसार आगामी दिनमै राष्ट्रिय स्तरको बुद्धिचाल संचालन गर्ने, मसिंर ६ गते देखि राष्ट्रपति रनिङ शिल्ड आयोजना गर्ने र यसै बर्ष तेक्वान्दो प्रतियोगिता समेत संचालन गर्ने जानकारी दिएका छन्।