बागेश्वरी माध्यमिक विद्यालयले सांस्कृतिक कार्यक्रम सहित मनायो ६२ औं वार्षिकोत्सव

गल्छी,धादिङ । धादिङ गल्छी गाउँपालिका वडा नम्बर ६ बैरेनीमा श्री बागेश्वरी माध्यमिक विद्यालयले ६२ औं वार्षिकोत्सव मनाएको छ । आज बुधबार श्रीपञ्चमीको अवसरमा विद्यालयले राष्ट्रिय कलाकारहरुको‌‌ प्रस्तुति सहित ६२ औं वार्षिकोत्सव मनाएको छ।

कार्यक्रममा केदारटीका स्मृति अक्षय कोष मार्फत २०७६ साल देखि हाल सम्मका उत्कृष्ट विद्यार्थीहरुलाई पुरस्कार प्रदान गरिएको थियो।विद्यालयमा अध्यापन गराएर अन्यत्र सरुवा भएका एवं अवकाश लिएका शिक्षक, शिक्षिकाहरुलाई सम्मान गरेको थियो भने उत्कृष्ट अभिभावकलाई पनि सम्मान गरेको थियो। कार्यक्रमा विद्यालयका नर्सरी देखि कक्षा १२ सम्मका विद्यार्थीहरुले विभिन्न किसिमका सांस्कृतिक प्रस्तुति देखाएका थिए भने राष्ट्रिय ख्याति प्राप्त कलाकार विद्यालय कै पूर्व विद्यार्थी शिशिर भण्डारी, प्रतिमा अर्याल लगायत अन्य कलाकारहरुको पनि प्रस्तुति रहेको थियो। 

विद्यालय व्यवस्थापन समितिका अध्यक्ष केशव रिमालको अध्यक्षता र गल्छी गाउँपालिका अध्यक्ष केदारनाथ खतिवडाको प्रमुख आतिथ्यता रहेको कार्यक्रममा डा. नमराज लम्साल, गल्छी गाउँपालिका उपाध्यक्ष भाईकाजी तिवारी, गल्छी गाउँपालिका वडा नं ६ का वडाध्यक्ष दिपक कार्की, वडा नं ४ का वडाध्यक्ष राजु अधिकारी, गल्छी गाउँपालिका शिक्षा, युवा तथा खेलकुद शाखा प्रमुख पेमादोर्जे थोकर, शिक्षक, शिक्षिका, विद्यार्थी, अभिभावक लगायतको उपस्थिति रहेको थियो।