विरगञ्ज । बारा जिल्लामा एकै परिवारका आमा र छोराको धारिलो हतियार प्रहार गरी हत्या भएको छ भने बुबा र छोरी गम्भीर घाइते भएका छन्।
जिल्ला प्रहरी कार्यालय बाराका प्रवक्ता तथा प्रहरी नायब उपरीक्षक (डीएसपी) विजयराज पण्डितका अनुसार परवानीपुर गाउँपालिका–१ स्थित रहरियाडीमा ४६ वर्षीया सुमित्रा देवी मण्डल र उनका २४ वर्षीय छोरा रामेश्वर मण्डलको हत्या भएको हो।
डीएसपी पण्डितका अनुसार आज बिहान करिब ३ बजेको समयमा अज्ञात व्यक्तिले धारिलो हतियार प्रयोग गरी आक्रमण गर्दा आमा र छोराको घटनास्थलमै मृत्यु भएको थियो।
उक्त आक्रमणमा परिवारकै ५० वर्षीय जगरूप मण्डल र २२ वर्षीया छोरी रिना कुमारी मण्डल गम्भीर घाइते भएका छन्। उनीहरूको परवानीपुरस्थित एलएस न्युरो अस्पतालमा उपचार भइरहेको प्रहरीले जनाएको छ।
हत्या कसले र किन गरेको भन्ने विषयमा हालसम्म खुल्न नसकेको प्रहरीले जनाएको छ। घटनाको अनुसन्धानका लागि तालिम प्राप्त कुकुरको सहयोग लिइएको र संलग्न व्यक्तिको खोजीका लागि सुरक्षा सतर्कता बढाइएको डीएसपी पण्डितले जानकारी दिए।
तस्विर : १२ खरी
