काठमाडौँ — आन्दोलनरत शिक्षकहरूले सरकारसँग आज राति १२ बजेसम्म सहमति नभए भोलिदेखि निषेधित क्षेत्र तोडेर सामूहिक रूपमा गिरफ्तारी दिन चेतावनी दिएका छन्।
नेपाल शिक्षक महासङ्घले आफ्ना मागहरूमा सहमति नभए काठमाडौँको निषेधित क्षेत्रभित्र प्रवेश गरी स्वतःस्फूर्त रूपमा गिरफ्तारी दिने निर्णय गरेको हो। महासङ्घका अनुसार, शिक्षकहरूको आन्दोलनलाई बेवास्ता गर्दै सरकारले वार्तामा गम्भीरता नदेखाएकाले यस्तो कदम चाल्न बाध्य भएको हो।
शिक्षकहरूले विगत केही दिनदेखि शिक्षा ऐन र अन्य सरोकारका विषयमा सरकारसँग वार्ता माग गर्दै आन्दोलन चर्काइरहेका छन्। तर, वार्ता प्रक्रिया ठोस रूपमा अघि नबढेको भन्दै उनीहरूले दबाबस्वरूप निषेधित क्षेत्रतर्फ जान लागिएको बताएका छन्।
“हामीले राति १२ बजेसम्मको समय दिएका छौँ। त्यसअघि सहमति भएन भने भोलिदेखि सामूहिक गिरफ्तारी हुनेछ,” एक आन्दोलनरत शिक्षक नेताले बताए।
