काठमाडौं — चर्चित गायन रियालिटी शो ‘द भ्वाइस अफ नेपाल सिजन ६’ को उपाधि १८ वर्षीय प्रोसेस पाण्डेले जितेका छन्। धादिङ घर भई हाल कक्षा १२ मा अध्ययनरत पाण्डे दृष्टिमा समस्या हुँदाहुँदै पनि आफ्नो संगीत यात्रा अगाडि बढाउँदै पहिलो प्रयासमै विजेता बन्न सफल भएका हुन्।
सानैदेखि गायनमा रुचि राख्दै आएका पाण्डेले भ्वाइस अफ नेपालको मञ्चलाई आफ्नो कला प्रस्तुत गर्ने थलो बनाएका थिए। उत्कृष्ट प्रस्तुतीमार्फत दर्शक र निर्णायकहरूको मन जित्दै उनी अन्ततः विजेता बने।
विजेता बनेपछि भावुक हुँदै उनले भने, “म यो सफलता आफ्ना आमाबुबा, गुरुजन र समर्थकहरूलाई समर्पण गर्न चाहन्छु। मलाई सहयोग गर्ने सबैलाई धन्यवाद। मैले जितेको पुरस्कार राशीको केही रकम वृद्धाश्रममा सहयोग गर्नेछु।”
उनको यस्तै सकारात्मक सोच र समाजप्रति समर्पण भावनाले धेरैलाई प्रेरित बनाएको छ।
