धादिङ, जेठ ३ – धादिङ जिल्लाको गल्छी गाउँपालिका–१ फोसटारस्थित त्रिशुली नदीको किनारमा अन्दाजी ११/१२ वर्षीया बालिकाको शव फेला परेको छ।
शनिबार (२०८२ साल जेठ ३ गते) दिउँसो करिब ४:५० बजे स्थानीय बासिन्दाले त्रिशुली नदी किनारमा बालिकाको शव देखेपछि प्रहरीलाई खबर गरेका थिए। सूचना प्राप्त भएलगत्तै बैरेनी प्रहरी चौकीबाट प्रहरी नायब निरीक्षक (प्र.ना.नि.) काशीराम बुढाको टोली घटनास्थलमा खटिएको थियो।
प्रहरीले प्रारम्भिक अनुसन्धान गर्दा उक्त बालिका २०८२ साल वैशाख ३० गते नुवाकोट जिल्ला बेलकोटगढी नगरपालिका–७ बाट बेपत्ता भएकी जेनी ढङ्गोल भएको आशंका गरिएको थियो। यसै आधारमा बालिकाका पिता देव ढङ्गोललाई खबर गरिएपछि उनले घटनास्थलमा आएर शव आफ्नै छोरीको भएको पुष्टि गरेका छन्।
बालिकाको शवलाई आवश्यक कानुनी प्रक्रिया पूरा गरी मुजुल्का उठाएर पोष्टमार्टमको लागि आज राति ७:३० बजे गजुरी पठाइएको प्रहरीले जनाएको छ।
