तानसेन, पाल्पा — २२ मे २०२५
विश्वकै सर्वोच्च शिखर सगरमाथाको चुचुरोमा पाल्पालीको साहसले नयाँ कीर्तिमान कायम गरेको छ। पाल्पा तानसेन नगरपालिका–७ काजिपौवाका अर्जुन थापा मगरले २०८२ जेठ ८ गते बिहान ३:१८ बजे सगरमाथा (८,८४८.८६ मिटर) सफलतापूर्वक आरोहण गर्न सफल भएका छन्।
भारतीय सेनामा कार्यरत थापा मगरको यो सफल आरोहणले पाल्पा जिल्ला मात्र होइन, सम्पूर्ण नेपालीहरूको शिर गर्वले उचो बनाएको छ। कठिन परिस्थितिहरू, शून्य डिग्रीको तापक्रम र अक्सिजनको कमीबीच उनले देखाएको साहस, आत्मबल र धैर्य प्रशंसनीय छ।
उनको यो उपलब्धिलाई लिएर तानसेनमा हर्षको लहर छ। स्थानीय निकाय, संघसंस्था तथा आम नागरिकहरूले उनलाई बधाई तथा शुभकामनाहरू दिइरहेका छन्। अर्जुन थापा मगरको नाम अब सगरमाथा आरोहण गर्ने साहसी पाल्पालीको रूपमा दर्ज हुनेछ।
उनको यो सफलताको समाचारले भविष्यमा अन्य युवाहरूलाई पनि हिमाली अभियानतर्फ प्रेरित गर्ने अपेक्षा गरिएको छ। नेपाल र नेपालीका लागि गौरवको क्षण र प्रेरणाको स्रोत बनेका अर्जुन थापा मगरलाई हार्दिक बधाई!
