ललितपुर, महालक्ष्मी नगरपालिका वडा नं. ९ को आयोजनामा हुन गइरहेको तेस्रो वडा अध्यक्ष कप बुद्धिचाल प्रतियोगिता को सम्पूर्ण तयारी पूरा भएको छ।
ललितपुर जिल्ला, महालक्ष्मी नगरपालिका तथा वडा नं. ९ का खेलाडीहरूलाई बुद्धिचाल खेलतर्फ उत्साहित गर्ने उद्देश्यले आयोजना गर्न लागिएको प्रतियोगितामा विशेष पुरस्कारको समेत व्यवस्था गरिएको आयोजकले जनाएको छ।
आगामी पौष ४ गतेदेखि सञ्चालन हुने प्रतियोगितामा कुल नगद रु. १ लाख ३२ हजार पुरस्कार राशि राखिएको छ। प्रतियोगिता स्विस लिग प्रणाली अन्तर्गत ९ राउण्डमा खेलाइनेछ भने दुई दिनसम्म सञ्चालन हुने वडा नं. ९ का वडा अध्यक्ष जयकृष्ण बोगटीले जानकारी दिनुभयो।
स्थानीय तहमा बुद्धिचाल खेलको विकास, खेलाडीहरूको पहिचान र प्रतिस्पर्धात्मक क्षमता अभिवृद्धि गर्ने उद्देश्यले आयोजना गरिएको प्रतियोगिताप्रति खेलाडी तथा खेलप्रेमीहरूको उल्लेख्य चासो देखिएको छ।
