गल्छी, पुस २६ – धादिङको गल्छी गाउँपालिका वडा नम्बर ८ लाई बालमैत्री स्थानीय शासनयुक्त वडा घोषणा गरिएको छ। “बालबालिकामा लगानी : सुनिश्चित भविष्यको थालनी” भन्ने नाराका साथ आयोजित विशेष कार्यक्रममा वडा नम्बर ८ लाई औपचारिक रूपमा बालमैत्री वडा घोषणा गरिएको हो।
गल्छी गाउँपालिका र वडा कार्यालयको समन्वयमा आज वडा नम्बर ८ को गोगनपानीमा आयोजित कार्यक्रममा स्थानीय शासन कार्यान्वयन निर्देशिका, २०७८ ले निर्धारण गरेका ५१ वटा सूचक पूरा गरेपछि वडा नम्बर ८ लाई बालमैत्री वडा घोषणा गरिएको प्रमाणपत्र प्रदान गरिएको हो। बालअधिकार संरक्षण, बालविवाह न्यूनीकरण, बालश्रम अन्त्य तथा बालबालिकाको शिक्षा, स्वास्थ्य र सहभागितामा उल्लेखनीय उपलब्धि हासिल भएकाले वडा घोषणा गरिएको जनाइएको छ।
घोषणा कार्यक्रम वडा नम्बर ८ का वडा अध्यक्ष विशाल लुङ्गेली मगरको सभापतित्वमा सम्पन्न भएको थियो। कार्यक्रममा बागमती प्रदेशका सामाजिक विकास मन्त्री माननीय कञ्चन चन्द्र बादे प्रमुख अतिथिका रूपमा उपस्थित हुनुहुन्थ्यो। विशेष अतिथिमा बागमती प्रदेशका पूर्व मन्त्री तथा प्रदेशसभा सदस्य मधुकुमार, गल्छी गाउँपालिकाका अध्यक्ष केदारनाथ खतिवडा र उपाध्यक्ष भाइकाजी तिवारी रहनुभएको थियो।
कार्यक्रममा विभिन्न वडाका वडा अध्यक्षहरू, जनप्रतिनिधि, कर्मचारी, शिक्षक, अभिभावक तथा बालबालिकाको उपस्थिति रहेको थियो। कार्यक्रममा वक्ताहरूले बालमैत्री वातावरण निर्माणले बालबालिकाको समग्र विकास, सुरक्षित भविष्य र सामाजिक रूपान्तरणमा महत्वपूर्ण योगदान पुर्याउने उल्लेख गर्दै आगामी दिनमा पनि निरन्तर सहयोग र सहकार्यको प्रतिबद्धता व्यक्त गरेका थिए।
फोटो : आशिष ठकुरी 
