पोखरा । गण्डकी प्रदेशमा विद्यार्थीहरूका लागि रणनीति र बुद्धिमत्ताको ठूलो मञ्च तयार हुँदैछ। मदरल्याण्ड चेस क्लबको आयोजनामा सञ्चालन हुने विद्यार्थी चेस फेस्टले प्रदेशभरका कक्षा १२ सम्म अध्ययनरत प्रतिभालाई एउटै प्रतिस्पर्धात्मक प्लेटफर्ममा ल्याउने लक्ष्य राखेको छ। विद्यार्थी परिचयपत्र र आधिकारिक सिफारिस अनिवार्य गरिएको छ।
कार्यक्रमअन्तर्गत विद्यार्थी टिम चेस च्याम्पियनसिप FIDE नियमअनुसार स्विस प्रणालीमा ५–६ राउन्डमा सञ्चालन हुनेछ। प्रत्येक खेल १० मिनेट + १० सेकेन्ड इन्क्रिमेन्टमा खेलाइनेछ। प्रारम्भिक चरणपछि उत्कृष्ट १६ टिम नकआउट चरणमा प्रवेश गर्नेछन्। टिम संरचनामा ३ मुख्य खेलाडी, १ रिजर्भ र १ टिम म्यानेजर अनिवार्य रहने व्यवस्था गरिएको छ।
प्रतियोगितामा प्रथम, द्वितीय र तृतीय स्थान प्राप्त गर्ने टिमलाई क्रमशः रु. ५,०००, रु. ३,००० र रु. २,००० सहित ट्रफी, मेडल र प्रमाणपत्र प्रदान गरिनेछ। उत्कृष्ट बोर्ड खेलाडी र Rising Player लाई विशेष सम्मान गरिनेछ।
डिजिटल माध्यमबाट सञ्चालन हुने चेस क्विजमा इतिहासदेखि एन्डगेमसम्मका विविध चरण समावेश गरिनेछ। साथै, समय उपलब्ध भएमा क्रेजीहाउस चेस जोडी शैलीमा सञ्चालन गरिनेछ। एक कार्यक्रमका लागि रु. ५०० र दुई कार्यक्रमका लागि रु. ८०० दर्ता शुल्क निर्धारण गरिएको छ।
आयोजकका अनुसार यस महोत्सवले गण्डकी प्रदेशमा विद्यार्थीस्तरमा चेसलाई नयाँ ऊर्जा र प्रतिस्पर्धात्मक उचाइ दिने अपेक्षा गरिएको छ।
