गल्छि खबर | बुधबार, २०८१ चैत २४ | काठमाडौं –नेपालको आईटी भविष्य निर्माणतर्फ एक ऐतिहासिक कदम नेपाललाई प्रविधिको क्षेत्रमै अन्तर्राष्ट्रिय स्तरमा प्रतिस्पर्धी राष्ट्र बनाउने लक्ष्यसहित, लाइफ टेक प्रा.लि. ले “कोडिङ प्रतियोगिता सिजन–१” को आयोजना गर्ने घोषणा गरेको छ। देशभरका युवा प्रतिभाहरूलाई लक्षित गर्दै आयोजना गरिने यस प्रतियोगिताले विद्यार्थीहरूको कोडिङ क्षमताको पहिचान, प्रवर्धन तथा नवप्रवर्तनशील सोचलाई प्रोत्साहन गर्ने उद्देश्य राखेको छ।
विशेषगरी BIT, BSc.CSIT, BCA जस्ता कार्यक्रमहरूमा अध्ययनरत साथै कोडिङमा गहिरो रुचि भएका सम्पूर्ण विद्यार्थीहरूलाई समेट्ने गरी प्रतियोगिता खुला गरिएको छ। प्रतियोगीहरूले आफूले सहज रूपमा प्रयोग गर्ने कुनै पनि प्रोग्रामिङ भाषा चयन गर्न सक्नेछन् भने मुख्य प्रतिस्पर्धात्मक विषयवस्तु लाइफ टेक प्रा.लि.ले नै तोक्नेछ।
आजको द्रुत गतिमा परिवर्तन भइरहेको प्रविधिको युगमा शैक्षिक ज्ञान मात्र पर्याप्त नरही, औद्योगिक व्यवहार र व्यावहारिक सीपको समेत आवश्यकतालाई आत्मसात गर्दै, प्रतियोगिता शैक्षिक तथा व्यावसायिक खाडललाई पाट्ने सेतुको रूपमा प्रस्तुत हुने अपेक्षा गरिएको छ।
प्रतियोगिताबाट छानिएका उत्कृष्ट विचार तथा परियोजनाहरूलाई रु. १ करोडसम्मको लगानी प्रदान गरिनेछ, जसले युवाहरूलाई उद्यमशीलताको मार्गमा अघि बढ्न उत्प्रेरित गर्नेछ। त्यसैगरी सहभागीहरूलाई निःशुल्क उद्यमशीलता तथा सार्वजनिक वक्तृत्व तालिम समेत प्रदान गरिनेछ, जसले उनीहरूको सम्पूर्ण विकासमा टेवा पुर्याउने विश्वास लिइएको छ।
मुख्य विवरणहरू:
दर्ता सुरु हुने मिति: २०८१ फागुन १९ (२०२५ मार्च २)
मुख्य कार्यक्रम मिति: २०८२ पुष २० (२०२६ जनवरी ४)
स्थान: लाइफ टेक प्रा.लि. कार्यालय, नयाँ बानेश्वर, काठमाडौं
प्रवेश शुल्क: रू. २०००/- मात्र
प्रतियोगिताको माध्यमबाट सहभागीहरूले इन्टर्नसिप, रोजगारी तथा नेटवर्किङका अवसरहरू समेत प्राप्त गर्नेछन्। यसले नेपालको सूचना प्रविधि क्षेत्रमा नवप्रवर्तन र रोजगारीको नयाँ ढोका खोल्ने अपेक्षा गरिएको छ।
लाइफ टेक प्रा.लि. सम्पूर्ण इच्छुक विद्यार्थी र नवप्रवर्तनकारीहरूलाई यो ऐतिहासिक अवसरमा सहभागी भई आफ्ना विचारहरूलाई कार्यान्वयनमा ल्याउने, प्रतिस्पर्धा गर्ने र भविष्य निर्माण गर्ने सुनौलो अवसरको लाभ उठाउन हार्दिक आमन्त्रण गर्दछ।
