काठमाडौँ – संचार तथा सूचना प्रविधि मन्त्री पृथ्वीसुब्बा गुरूङले चैत मसान्तभित्र नेपालमा सञ्चालनमा रहेका सामाजिक सञ्जाल प्रदायकहरूले दर्ता नगरेमा ती प्लेटफर्महरू बन्द गरिने चेतावनी दिनुभएको छ।
‘हामीले मेटा (फेसबुक) लाई दर्ता गर्न सूचित गरेको दुई महिना बितिसकेको छ,’ मन्त्री गुरूङले स्पष्ट पार्नुभयो, ‘तर अहिलेसम्म कुनै औपचारिक प्रतिक्रिया आएको छैन। चैत मसान्तसम्म पनि दर्ता नभएमा बन्दको बाटोमा जानु हाम्रो बाध्यता हुनेछ।’
सरकारको यो अडान अन्तिम रहेको उल्लेख गर्दै उहाँले केही दिनमै फेसबुक जस्ता प्रमुख सामाजिक सञ्जाल बन्द हुने सम्भावना प्रबल रहेको बताउनुभयो। ‘आज र भोलिमै दर्ता प्रक्रिया पुरा हुने सम्भावना नदेखिएको अवस्थामा, आगामी दिनमा फेसबुक बन्द हुनु निश्चित जस्तै हो,’ उहाँले भन्नुभयो।
मन्त्री गुरूङले नेपालजस्तो सार्वभौम देशलाई बेवास्ता गर्दै सामाजिक सञ्जाल प्रदायकहरूले देखाएको व्यवहार आपत्तिजनक भएको पनि टिप्पणी गर्नुभयो। ‘हाम्रो कानुन र सार्वभौमिकता अपहेलना गर्दै यस्तो ढिलासुस्ती गर्नु अस्वीकार्य छ,’ उहाँको भनाइ छ।
नेपाल सरकारले हालै ल्याएको डिजिटल मिडिया तथा सामाजिक सञ्जाल नियमनसम्बन्धी नीति कार्यान्वयनको क्रममा यो कदम चालेको हो। सरकारले सबै सामाजिक सञ्जाल प्रदायकलाई नेपालमा कार्यालय दर्ता गर्न, कर तिर्न, र कानुनी जवाफदेही बन्न अनुरोध गर्दै आएको छ।
