काठमाडौं, वैशाख १२ – काठमाडौं महानगरपालिकाकी उपमेयर सुनिता डङ्गोलले आफूमाथि भइरहेका आलोचना र आक्रमणहरूलाई राष्ट्रविरोधी तत्त्वहरूको नियोजित प्रयासको संज्ञा दिएकी छन्।
बिहीबार राजधानीमा आयोजित ‘युथ सेलिब्रेसन’ कार्यक्रममा बोल्दै डङ्गोलले आफू इमानदार ढंगले राष्ट्र र जनताका लागि काम गरिरहेकै कारण केही तत्वहरू असह्य बनेको आरोप लगाइन्।
“कुनै पनि दिन, बार वा चाडपर्व नभनी जनता र राष्ट्रका लागि इमानदारीपूर्वक काम गरिरहेको छु,” उनले भनिन्, “मेरो कामको प्रभाव मुलुकभित्र मात्र होइन, अन्तर्राष्ट्रिय स्तरमा पनि देखिन थालेको छ। संसारका विभिन्न देश र सरकारले काठमाडौंको अनुभव साट्न निमन्त्रणा गर्न थालेका छन्।”
उनले आफू ‘योग ग्लोबल लिडर’ मा चयन हुनु देशकै लागि गर्वको विषय भएको उल्लेख गर्दै भनिन्, “यो मेरो व्यक्तिगत मात्र होइन, देश र युवाको उपलब्धि हो। यही उपलब्धिले धेरैलाई पोल्यो र त्यसपछि निरन्तर जथाभावी आक्रमण प्रयास भइरहेका छन्।”
डङ्गोलले राष्ट्रको विकास नचाहने र काम गरेर देखाउनेहरूलाई हेर्न नसक्नेहरूको कारण यस्तो अवस्था आएको बताउँदै भनिन्, “राष्ट्रविरोधी तत्त्वहरू सल्बलाइरहेका छन्, तर मेरो कामले नेपालको नाम विश्वभर उच्च राख्न सफल भएको छ।”
उनले यस्ता प्रयासहरूबाट विचलित नभई अझ दृढताका साथ राष्ट्र निर्माणमा लागि रहने प्रतिबद्धता पनि व्यक्त गरिन्।
