काठमाडौं, कालिमाटी – विगत १० वर्षदेखि राजधानीका विभिन्न स्थानमा गाडी पछ्याउँदै चोरी गर्दै आएका दुई जनालाई प्रहरीले पक्राउ गरेको छ। सामान लोड गरिएका गाडी तथा पिकअप भ्यानको पछाडि चढेर चोरी गर्ने कार्यमा संलग्न ती दुई जना मामाभान्जालाई प्रहरी वृत्त कालिमाटीको टोलीले विशेष सुराकीका आधारमा पक्राउ गरेको हो।
प्रहरीका अनुसार ती व्यक्तिहरू विशेषगरी चामल, तेल, दाल, बिस्कुट, सुकुमेल, ल्वाङलगायतका उपभोग्य वस्तु बोकेको गाडीहरू पछ्याउँथे। स्कूटी र मोटरसाइकलको प्रयोग गर्दै गाडीको पिछा गर्ने र ट्राफिक लाइटमा गाडी रोकिने बित्तिकै पछाडि चढेर सामान चोरी गर्ने उनीहरूको शैली रहेको खुल्न आएको छ।
अनुसन्धानका क्रममा उनीहरू विगत दशकदेखि यही तरिकाले चोरी गर्दै आएको र उनीहरूले प्रयोग गरेका सवारी साधनहरू समेत चोरीकै रहेको प्रहरीको प्रारम्भिक अनुसन्धानबाट पुष्टि भएको छ। हाल उनीहरूविरुद्ध आवश्यक अनुसन्धान प्रक्रिया अगाडि बढाइएको कालिमाटी वृत्तका प्रमुखले जानकारी दिएका छन्।
प्रहरीले महानगर क्षेत्रमा भइरहेका यस्ता गिरोह नियन्त्रित गर्न थप सतर्कता अपनाइएको पनि बताएको छ।
