धादिङ। गल्छी गाउँपालिका क्षेत्रका होटल व्यवसायी, सुन-चाँदी व्यवसायी, बैङ्क तथा वित्तीय संस्थाका प्रतिनिधिहरूसँग प्रहरी कार्यालयले शान्ति र सुरक्षा सम्बन्धी अन्तरक्रिया कार्यक्रम सम्पन्न भयो।
बैरेनी र गल्छी प्रहरी चौकीको समन्वयमा श्री छाङ्गेश्वर महादेव मन्दिरको सभा हलमा सम्पन्न भएको कार्यक्रममा होटल व्यवसायी (धादिङ उद्योग वाणिज्य संघका सदस्य) ईश्वरी धितालले व्यवसायिक सुरक्षा चुनौती र प्रहरीसँगको सहकार्यको आवश्यकता रहेको बताए। सुन-चाँदी व्यवसायी राजु सुनारले आफ्नो क्षेत्रमा हुने अपराध नियन्त्रणका लागि प्रहरीको सक्रियतामा सहयोग मागेका थिए।
त्यस्तै बैङ्क तथा वित्तीय संस्थाका प्रतिनिधि रेशमराज खतिवडाले आर्थिक अपराध र साइबर सुरक्षामा जागरूकता बढाउन आग्रह गरेका थिए।
गल्छी गाउँपालिका वडा नं. ८ का वडाध्यक्ष विशाल लुङ्गेली मगरले सामुदायिक सहभागिता बढाउने अपील गरे भने वडा नं. ७ का वडाध्यक्ष हरि प्रसाद खतिवडाले गाउँपालिका स्तरमा सुरक्षा योजना बनाउन प्रस्ताव राखे।
कार्यक्रमको अध्यक्षता गर्दै प्रहरी नायब उपरीक्षक विकास थापाले यस्ता अन्तरक्रियालाई नियमित बनाउने, व्यवसायी तथा स्थानीय निकायसँग मिलेर क्षेत्रीय सुरक्षा बढाउने बताए। उनले प्रहरी चौकीहरूको सघन गस्ती, अपराध नियन्त्रण, र आपतकालीन सेवामा सुधार गर्ने आश्वासन दिए।
यसरी, यो कार्यक्रम मार्फत व्यवसायिक सुरक्षा, सामुदायिक सहयोग, र प्रहरी-जनता सम्बन्ध मजबुत पार्ने प्रयास गरिएको छ।
