गल्छी, वैशाख ५ – बालबालिकाको अधिकारको संरक्षण र उनीहरूको सक्रिय सहभागिता सुनिश्चित गर्ने उद्देश्यले बालमैत्री स्थानीय शासनको अवधारणाअनुरूप स्थापित बालबालिका साझा मञ्च गल्छी तथा गल्छी बाल समूह संजालको संयुक्त आयोजनामा गल्छी गाउँपालिका स्तरीय कविता लेखन तथा वाचन प्रतियोगिता आयोजना हुने भएको छ।
“शब्द शब्दले बोल्नेछन् बालबालिकाको आवाज” भन्ने मूल नारासहितको कार्यक्रम आगामी २०८२ साल वैशाख २७ गते शनिबार, बिहान १०:०० बजेदेखि दिउँसो ४:०० बजेसम्म सञ्चालन गरिनेछ। प्रतियोगिताको मूल विषय बाल अधिकार रहेको छ।
कार्यक्रममा गल्छी गाउँपालिकाभित्रका १८ वर्ष मुनिका बालबालिका सहभागी हुन सक्नेछन्। प्रत्येक वडाबाट एक जना बालक र एक जना बालिका गरी दुई जनाले अनिवार्य सहभागिता जनाउनु पर्नेछ।
प्रतियोगिताका लागि कविता नेपाली भाषामा देवनागरी लिपिमा लेखिएको हुनुपर्नेछ। कविता कम्तीमा ३० शब्ददेखि बढीमा २०० शब्दसम्मको हुनुपर्ने छ। साहित्यिक चोरी पूर्ण रूपमा अस्वीकृत गरिनेछ भने निर्णय प्रक्रिया पारदर्शी हुने र निर्णायकको निर्णय अन्तिम मानिने आयोजकले जनाएका छन्।
बालबालिकाको सशक्तिकरण र सिर्जनात्मक अभिव्यक्तिलाई प्रवर्द्धन गर्ने उद्देश्यले आयोजना गरिएको यो प्रतियोगिताबाट सशक्त र सचेत बाल आवाजलाई अघि बढाउने अपेक्षा गरिएको छ।
