धादिङ – रुविभ्याली गाउँपालिका–१, लिंजोमा सञ्चालन भएको पाँचदिने खर्क व्यवस्थापनसम्बन्धी प्रशिक्षक तालिम शुक्रबार सम्पन्न भएको छ। डिभिजन वन कार्यालय, धादिङ र राष्ट्रिय प्रकृति संरक्षण कोषको आयोजनामा सञ्चालन भएको उक्त तालिममा स्थानीय चौँरी, भेडा र बाख्रा पालक किसानहरुको सक्रिय सहभागिता रहेको थियो।
डिभिजन वन कार्यालयका प्रमुख विष्णुप्रसाद आचार्यको अध्यक्षतामा सम्पन्न समापन समारोहमा सहभागी किसानहरुले तालिमबाट आवश्यक सीप र ज्ञान सिकेको भन्दै आगामी दिनमा पशुपालनलाई व्यवस्थित र व्यवसायिक बनाउने प्रतिबद्धता व्यक्त गरेका छन्।
तालिमको क्रममा किसानहरुले दुईवटा भेडा फार्म र एकवटा चौँरी फार्ममा प्रत्यक्ष अन्तरक्रिया पनि गरेका थिए। खर्कको व्यवस्थापन, चौँरी, भेडा र बाख्रामा देखिने रोग तथा समाधान, औषधोपचार र आहार व्यवस्थापन लगायतका विषयमा गहन छलफल गरिएको थियो। तालिमको सहजीकरण डिभिजन वन कार्यालयका प्रमुख विष्णुप्रसाद आचार्य, उमेश घले र सुनिल सापकोटाले गर्नुभएको थियो।
तालिमपछि सहभागी किसानहरुको नेतृत्वमा तीनवटा समूह गठन गरिएको छ— चौँरी पालक समूह (अध्यक्ष: वि. बहादुर तामाङ), भेडा पालक समूह (अध्यक्ष: सेर बहादुर तामाङ) र बाख्रा पालक समूह (अध्यक्ष: ए. बहादुर तामाङ)।
क्षेत्रमा हाल झण्डै ८ हजार भेडा, ३ सय चौँरी, केही तेल्मा, १० वटा याक र १७ वटा नाक रहेको जानकारी दिँदै सहभागीहरुले यी स्रोतहरूको संरक्षण र उत्पादन वृद्धिको माध्यमबाट आर्थिक आम्दानीमा रूपान्तरण गर्ने प्रतिबद्धता जनाएका छन्।
डिभिजन वन कार्यालयका प्रमुख आचार्यले तालिम उत्साहजनक र सहभागितामूलक भएको बताउँदै, आगामी दिनमा कृषि तथा पशुपालनसँग सम्बन्धित कार्यालयहरूसँग समन्वय गरी किसानहरुको जिविकोपार्जनमा सघाउने प्रतिवद्धता व्यक्त गर्नुभयो।
