२०८२ जेठ १६, बेलकोटगढी। बेलकोटगढी नगरपालिका वडा नं ५ को आयोजनामा तथा अम्बी भरोसा अस्पतालको प्राविधिक सहयोगमा शनिबार लामाचौरमा एकदिने निःशुल्क स्वास्थ्य शिविर सम्पन्न भएको छ।
स्वास्थ्य सेवा प्रवाहलाई स्थानीयस्तरमै प्रभावकारी बनाउने उद्देश्यले सञ्चालित शिविरमा १५० जना सर्वसाधारणले विभिन्न स्वास्थ्य सेवाहरू प्राप्त गरेका छन्। शिविरमा विशेषगरी नशा सम्बन्धी तथा हाडजोर्नीका समस्या भएका बिरामीहरूको संख्या उल्लेख्य देखिएको जनाइएको छ।
स्वास्थ्य परीक्षणका क्रममा देखिएका समस्या अनुसार आवश्यक परामर्श र औषधि वितरण समेत गरिएको थियो। आयोजनाबाट स्थानीयवासीहरू लाभान्वित भएका छन् भने यस प्रकारका कार्यक्रमले ग्रामीण भेगका जनतालाई स्वास्थ्य सेवामा पहुँच बढाउने विश्वास गरिएको छ।
शिविर सफल बनाउन सहयोग गर्ने सम्पूर्ण पक्षप्रति आयोजक वडाले आभार प्रकट गरेको छ।
