धादिङ, जेठ २४ – सक्सेस एकेडेमीको आयोजनामा तथा तिलगंगा आँखा केन्द्रको प्राविधिक सहयोगमा एक दिने निःशुल्क आँखा परीक्षण शिविर सम्पन्न भएको छ।
शिविरमा कुल १७७ जनाको आँखा परीक्षण गरिएकाेमा १३ जनामा शल्यक्रिया आवश्यक देखिएको जानकारी आयोजकले दिएका छन्। ती बिरामीहरूलाई आउँदो हप्ताभित्र काठमाडौंस्थित तिलगंगा आँखा केन्द्रमा लगेर निःशुल्क शल्यक्रिया गरिने बताइएको छ।
सामाजिक उत्तरदायित्वअन्तर्गत (CSR) सञ्चालन गरिएको उक्त शिविर सफलतापूर्वक सम्पन्न भएकोमा आयोजक संस्था सक्सेस एकेडेमीले तिलगंगा आँखा केन्द्रलगायत सबै सहयोगी तथा सहभागीप्रति आभार व्यक्त गरेको छ।
सक्सेस एकेडेमीले आगामी दिनहरूमा पनि यस्ता सामाजिक सेवामूलक कार्यक्रमहरूलाई निरन्तरता दिने प्रतिबद्धता जनाएको छ।
