गल्छी, धादिङ। छाङ्गादेवी नौमती महिला बाजा समूहद्वारा सञ्चालित दुई महिनाको तालिम एक विशेष समारोहका बीच सम्पन्न भएको छ। कार्यक्रमको अध्यक्षता समूहकी अध्यक्ष देवकी श्रेष्ठले गर्नुभयो।
समापन समारोहका प्रमुख अतिथि गल्छी गाउँपालिकाका उपाध्यक्ष भाइकाजी तिवारी रहनु भयो। कार्यक्रममा वडा नम्बर ४, ६, ७ र ८ का वडाध्यक्षहरू विशेष अतिथिका रूपमा सहभागी थिए।
तालिम बैरेनी सिकाई केन्द्र र गल्छी गाउँपालिकाको सहकार्यमा सञ्चालन गरिएको थियो। सिकाई केन्द्रका अध्यक्ष शिव भण्डारीको नेतृत्वमा सम्पन्न कार्यक्रमको सञ्चालन सिता लामिछानेले गर्नु भएको थियो भने तालिमको प्रतिवेदन गीता खरेलले प्रस्तुत गर्नुभयो।
समापन समारोहमा विभिन्न राजनीतिक दलका प्रतिनिधिहरुको उपस्थिति रहेको थियो। कार्यक्रममा अतिथिहरुले महिला सशक्तिकरण र संस्कृतिको जगेर्नामा नौमती बाजा तालिमको महत्वबारे आफ्ना धारणा राखेका थिए।
समूहका तर्फबाट आयोजक, प्रशिक्षक तथा सहभागी सबैलाई धन्यवाद दिँदै भविष्यमा अझ प्रभावकारी कार्यक्रमहरू सञ्चालन गरिने प्रतिबद्धता व्यक्त गरिएको थियो।
