गल्छीखबर डट कम – धादिङ । स्थानीय सञ्चारकर्मीहरूको दक्षता अभिवृद्धि गर्ने उद्देश्यसहित ‘विकास पत्रकारिता र कृत्रिम बौद्धिकता (एआई) को प्रयोग’ विषयक तीनदिने विशेष तालिम बेनीघाट रोराङ गाउँपालिकामा आजबाट सुरु भएको छ।
नेपाल पत्रकार महासंघ जिल्ला शाखा धादिङको आयोजनामा तथा बेनीघाट रोराङ गाउँपालिकाको सहयोगमा सुरु गरिएको तालिममा जिल्लाका विभिन्न सञ्चारमाध्यममा सक्रिय २६ जना पत्रकार सहभागी छन्।
उद्घाटन सत्रमा बोल्दै गाउँपालिकाका अध्यक्ष कृष्ण बहादुर थपलिया (विवेक) ले एआईजस्ता आधुनिक प्रविधिले पत्रकारिता क्षेत्रलाई नयाँ दिशा दिएको बताउनुभयो।
“एआईले पत्रकारिता सहज बनाउने मात्र होइन, थप जिम्मेवारी पनि थप्छ,” उहाँले भन्नुभयो, “यस्ता तालिमले तथ्यपरक, विश्वसनीय र विकास–मुखी सूचना प्रवाहमा ठूलो भूमिका खेल्छ।” उहाँले पत्रकारिताले विकास–निर्माणका एजेण्डामा निरन्तर ध्यान दिनुपर्नेमा जोड दिनुभयो।
त्यस्तै, नेपाल पत्रकार महासंघ धादिङका अध्यक्ष सीताराम अधिकारीले विकास पत्रकारिता अहिलेको समयको अपरिहार्य आवश्यकता भएको उल्लेख गर्नुभयो। उहाँका अनुसार स्थानीय मुद्दा उठान, तथ्य–आधारित रिपोर्टिङ तथा एआई उपकरणको सही प्रयोगले स्थानीय पत्रकारिताको स्तर उल्लेख्य रूपमा उकासिनेछ।
“प्रविधिबिना आधुनिक पत्रकारिता सम्भव छैन,” अध्यक्ष अधिकारीले भन्नुभयो, “एआईको प्रभावकारी उपयोगले स्थानीय समाचारको गुणस्तर थप उचाइमा पुग्छ।”
मंसिर १५ देखि १७ गतेसम्म सञ्चालन हुने तालिममा सहभागी पत्रकारहरूले विकास पत्रकारिताका सिद्धान्त, तथ्य संकलनका प्रविधि, स्थानीय विकासका मुद्दा पहिचान तथा एआई उपकरणहरूको व्यावहारिक प्रयोगबारे प्रशिक्षण प्राप्त गर्नेछन्।
यो तालिमले धादिङ जिल्लामा विकास पत्रकारिता सुदृढ गर्न, प्रविधि–मैत्री समाचार लेखनलाई प्रवद्र्धन गर्न तथा स्थानीय सञ्चारकर्मीलाई अझ सक्षम बनाउने अपेक्षा राखिएको आयोजकले जनाएको छ।
