नुवाकोट, २८ मंसिर। नुवाकोट जिल्लाको बेलकोटगढी नगरपालिका–४ स्थित श्री आधारभूत विद्यालयमा अध्ययनरत विद्यार्थी नानीबाबुहरूलाई लक्षित गरी न्यानो कपडा वितरण कार्यक्रम सम्पन्न गरिएको छ। चिसो बढ्दै गएको मौसमका कारण विद्यार्थीहरूको स्वास्थ्य र नियमित पठनपाठनमा सहजता होस् भन्ने उद्देश्यका साथ कार्यक्रम आयोजना गरिएको हो।
कार्यक्रमका लागि नेपाली कम्युनिस्ट पार्टीका युवा नेता तथा समाजसेवी कमरेड रुद्र ढुंगेलले १३५ थान न्यानो कपडाको व्यवस्थापन गर्नुभएको हो। विद्यालयमा अध्ययनरत आर्थिक रूपमा विपन्न तथा सामान्य परिवारका विद्यार्थीहरूलाई लक्षित गरी वितरण गरिएको न्यानो कपडाले विद्यार्थीहरूमा खुसी छाएको विद्यालय प्रशासनले जनाएको छ।
विद्यालय व्यवस्थापन समितिका पदाधिकारीहरूका अनुसार यस्ता सामाजिक सहयोग कार्यक्रमले शिक्षा क्षेत्रमा सकारात्मक सन्देश प्रवाह गर्नुका साथै समुदाय र विद्यालयबीचको सम्बन्ध थप मजबुत बनाउने विश्वास व्यक्त गरिएको छ।
सामाजिक सेवामा सक्रिय रहँदै आएका ढुंगेल गल्छीखबर डटकमका कानुनी सल्लाहकारसमेत हुनुहुन्छ। स्थानीय अभिभावक तथा सरोकारवालाहरूले बालबालिकाको हितलाई केन्द्रमा राखेर गरिएको यस सहयोगप्रति आभार व्यक्त गरेका छन्।
