गल्छी । महादेवफाँट खेल मैदानमा आज सम्पन्न फाइनल खेलमा गल्छी क्रिकेट क्लबले बेलकोटगढी नगरपालिकालाई ९ विकेटले पराजित गर्दै प्रथम चिम्टेश्वर कप क्रिकेट प्रतियोगिताको उपाधि जित्न सफल भएको छ।
टस जितेर पहिले बलिङ गर्ने निर्णय गरेको गल्छी क्रिकेट क्लबले बलिङ र फिल्डिङ दुवै पक्षमा सशक्त प्रदर्शन गर्यो। बेलकोटगढी नगरपालिकाको टोलीलाई १४.२ ओभरमा मात्र ७५ रनमा समेट्न गल्छी सफल रह्यो। गल्छीका कप्तान रवीन्द्र नेपालले उत्कृष्ट बलिङ गर्दै ५ विकेट लिए भने प्रविन खतिवडाले २ विकेट र समिर अधिकारीले १ विकेट हात पारे।
गल्छीको बलिङसँगै चुस्त फिल्डिङ पनि खेलको निर्णायक पक्ष बन्यो। प्रविन खतिवडा र रामहरी सापकोटाको बलिङमा दुई खेलाडी रनआउट हुँदा बेलकोटगढी दबाबमा परेको थियो।
७६ रनको लक्ष्य पछ्याउन मैदान उत्रिएको गल्छीले आक्रामक तर संयमित ब्याटिङ गर्दै ८ ओभरमा मात्र १ विकेटको क्षतिमा लक्ष्य पूरा गर्यो। गल्छीका लागि सन्देश नेपालले ३५ रन तथा सरोज लामाले ३० रनको योगदान दिए।
बेलकोटगढी नगरपालिकाका तर्फबाट विधान खतिवडाले पहिलो ओभरमै गल्छीका प्रविन खतिवडालाई रनआउट गराउँदै केही आशा जगाए पनि त्यसपछि खेल गल्छीको नियन्त्रणमै रह्यो।
गल्छी, थार्के, विदुर र बेलकोटगढी गरी चार टिमको सहभागिता रहेको उक्त प्रतियोगितामा उत्कृष्ट प्रतिस्पर्धा देखिएको थियो। उपाधिसँगै गल्छी क्रिकेट क्लबले नगद रु ३०,००० पुरस्कार प्राप्त गरेको आयोजकले जनाएको छ।
