गल्छि खबर।
गुल्मी, २३ बैशाख।
सामाजिक उत्तरदायित्व कार्यक्रम अन्तर्गत आरम्भ चौतारी लघुवित्त वित्तीय संस्था लिमिटेड, शाखा कार्यालय छत्रकोटले गुल्मीको छत्रकोट गाउँपालिका–५ मानकोटस्थित आत्मबोध माध्यमिक विद्यालयका विद्यार्थीहरूलाई शैक्षिक सामग्री वितरण गरेको छ।
संस्थाको आयोजनामा नर्सरीदेखि कक्षा ५ सम्म अध्ययनरत विद्यार्थीहरूलाई कापी लगायतका शैक्षिक सामग्री हस्तान्तरण गरिएको हो। साना बालबालिकाको पठनपाठनलाई सहज र प्रभावकारी बनाउने उद्देश्यले उक्त कार्यक्रम सञ्चालन गरिएको संस्थाले जनाएको छ।
विद्यालय व्यवस्थापन समितिका ज्येष्ठ सदस्य हरि प्रसाद पाण्डेको अध्यक्षतामा सम्पन्न कार्यक्रममा अनुगमन कार्यालय अर्गलीका अनुगमन अधिकृत ऋषिराम सापकोटा प्रमुख अतिथिका रूपमा सहभागी हुनुभएको थियो।
कार्यक्रममा शाखा प्रमुख कृष्ण प्रसाद बेलवासे, अभिभावक संघका प्रतिनिधि पूर्णबहादुर बुचा लगायत स्थानीय सरोकारवालाहरूको उल्लेखनीय उपस्थिति रहेको थियो।
कार्यक्रममा बोल्दै विद्यालयका निमित्त प्रधानाध्यापक रामहरि पाण्डेले यस्ता सहयोगात्मक पहलले विद्यार्थीहरूमा अध्ययनप्रति उत्साह थप्ने विश्वास व्यक्त गर्नुभयो। उहाँले शिक्षा क्षेत्रमा निजी तथा वित्तीय संस्थाहरूको सहकार्य आवश्यक रहेको समेत उल्लेख गर्नुभयो।
विद्यालयका अनुसार, वितरण गरिएको शैक्षिक सामग्रीले विशेषगरी साना कक्षाका विद्यार्थीहरूको पठनपाठनमा प्रत्यक्ष सहयोग पुग्ने अपेक्षा गरिएको छ।
स्थानीय तहमा सामाजिक उत्तरदायित्व अन्तर्गत सञ्चालन गरिएका यस्ता कार्यक्रमहरूले शिक्षा क्षेत्रमा सकारात्मक सन्देश प्रवाह गर्नुका साथै समुदाय–संस्था सहकार्यलाई अझ सुदृढ बनाउने सहभागीहरूले बताएका छन्।
