धादिङ, गल्छी खबर । निजी तथा आवासीय विद्यालय अर्गनाइजेसन, नेपाल (प्याब्सन) धादिङको आयोजनामा अन्तर-विद्यालय स्तरीय हाजिरी जवाफ (क्वीज) प्रतियोगिता जिल्लाको शान्तिदीप एकेडेमीमा सम्पन्न भएको छ। प्रतियोगितामा जिल्लाका विभिन्न १३ विद्यालयको सहभागिता रहेको थियो।
प्याब्सन धादिङका ईसीए इन्चार्ज सञ्जीव गजुरेलका अनुसार प्रतियोगिता तिन चरणमा सञ्चालन गरिएको थियो। सामान्य ज्ञान, छिटो उत्तर, बजार तथा प्रतिस्पर्धात्मक राउन्डमार्फत विद्यार्थीहरूको बौद्धिक क्षमताको परीक्षण गरिएको थियो।
प्रतियोगितामा सक्सेस एकेडेमी प्रथम, मुनाल एकेडेमी द्वितीय र शान्तिदीप एकेडेमी तृतीय स्थानमा रहेका छन्। यसैगरी ब्लुमिङ लोटस माध्यमिक विद्यालय र धुनिवेसी माध्यमिक विद्यालयले सान्त्वना स्थान हासिल गरेका छन्।
कार्यक्रममा धुनिवेसी नगरपालिकाका उपमेयर सुरज उप्रेति प्रमुख अतिथिका रूपमा उपस्थित रहनुभयो। विद्यार्थीहरूमा बौद्धिक विकास, आत्मविश्वास र स्वस्थ प्रतिस्पर्धा अभिवृद्धि गर्न यस्ता गतिविधि प्रभावकारी हुने उल्लेख गर्दै उहाँले विद्यालयस्तरमै यस्ता कार्यक्रम विस्तार गर्नुपर्नेमा जोड दिनुभयो।
प्याब्सन धादिङका अनुसार प्रतियोगितामा विजयी टिमले अब प्याब्सन वागमती प्रदेश कार्यसमितिले आयोजना गर्ने हाजिरी जवाफ प्रतियोगितामा धादिङ जिल्लाको प्रतिनिधित्व गर्नेछ।
